Се поставуваат реквизити на новото детско игралиште во Трговскиот центар

Изградбата на детското игралиште во Трговскиот центар е во завршна фаза. Денеска се  поставуваат реквизитите. Новиот терен за детска игра ќе има гумена подна подлога, зеленило, бехатон патеки, урбана опрема и ќе биде осветлен со четири парковски столба.

Со уредувањето на игралиштето чија површина е 460 м², се одговара на потребите на децата во најпрометниот простор во Кочани. Изградбата на ова детско игралиште се наметна како еден вид завршница на реконструкцијата на Трговскиот центар, кој од пролетва е со нов плочник, осветлување, урбано зеленило и комунална опрема.

Трговскиот центар е петтата локација за нови детски игралишта во Кочани. Веќе се  готови игралиштата во Грдовци, на улицата „1 Мај“ во Белското Маало и во населбата Драчевик кај социјалните згради. На малата инсталација спроти Ветеринарната станица, ќе биде поставен нов асфалтен слој на теренот пред станбените згради.

Паралелно со детските игралишта се уредуваат и повеќенаменските во Грдовци и Прибачево, а реконструкцијата на игралиштето во Тркање е завршена.

Сите овие јавни терени се градат со средства од Буџетот на Општина Кочани, а се издвоени и 3 милиони денари за реконструкција на останатите игралишта во градот и во населените места, како и за целосна реконструкција на детското игралиште во населбата Бавчалук.