![](http://192.168.1.5:81/kocani/wp-content/uploads/2018/07/opstinakocanidetskiigralista1.jpg)
Уредувањето на Детското игралиште кај Атомските згради, каде што се префрлени реквизитите од Градскиот парк – вовчето, два тобогана, лулашки и клацкалки, е во завршна фаза. Деновиве работниците на Комуналното јавно претпријатие „Водовод“ поставуваат песочна подлога и ги вршат последните поправки на теренот, кој децата од овој дел на Кочани наскоро ќе можат да го користат.
![](http://192.168.1.5:81/kocani/wp-content/uploads/2018/07/opstinakocanidetskiigralista2.jpg)
Новиот детски парк кај Атомските згради произлезе од потребата за соодветен простор за детска игра, но и од реновирањето на игралиштето во Градскиот парк, каде со донација од „Антура“ се поставија нови реквизити.
![](http://192.168.1.5:81/kocani/wp-content/uploads/2018/07/opstinakocanidetskiigralista3.jpg)
Градоначалникот на Кочани, Николчо Илијев, информира дека веќе започна да се подготвува проект за детско игралиште и во Белското маало, каде што пред неколку години постоел парк со борова шума.
![](http://192.168.1.5:81/kocani/wp-content/uploads/2018/07/opstinakocanidetskiigralista6.jpg)
– На барање на жителите од оваа населба, ние одговараме позитивно со цел оваа зелена површина да биде максимално корисна за најмладите, но и за возрасните. Овде планираме да бидат поставени детски играчки, клупи и друга парковска урбана опрема – вели Илијев кој за намерите за реализација на проектот разговараше и со жителите од овој крај.
![](http://192.168.1.5:81/kocani/wp-content/uploads/2018/07/opstinakocanidetskiigralista5.jpg)
Од вкупната површина, за детско игралиште во Белското Маало ќе бидат наменети 88 м2, а 430 м2 ќе остане тревна површина на која ќе бидат засадени уште 15 нови садници.
![](http://192.168.1.5:81/kocani/wp-content/uploads/2018/07/opstinakocanidetskiigralista7.jpg)
![](http://192.168.1.5:81/kocani/wp-content/uploads/2018/07/opstinakocanidetskiigralista8.jpg)