Градоначалникот на Општина Кочани Владко Грозданов, оствари средба со амбасадорот на Република Грција во Република Северна Македонија, Јанис Малукос, кој беше придружуван од заменик-амбасадорката Кристина Василату.
На средбата, градоначалникот Грозданов ја истакна досегашната добра соработка и изрази благодарност за поддршката што грчката страна ја даде во посттрауматскиот период, во насока на помош и поддршка на семејствата на загинатите и на повредените во пожарот во дискотеката „Пулс“.
За амбасадорот Малукос, ова е прва посета на општина по неговото назначување на новата дипломатска функција, што претставува потврда на подготвеноста за продолжување и унапредување на досегашната соработка.
На средбата беше истакнато значењето на меѓусебната поддршка и на продолжувањето на добрите односи и соработката меѓу двете земји, вклучително и на локално ниво.
