На 12 ноември, во амфитеатарот на Земјоделскиот факултет при Универзитетот „Гоце Делчев“ во Штип се одржа стручна работилница под наслов „Дигитални решенија за одржливо земјоделско производство“.
Настанот е дел од активностите на европскиот проект AgriExcel – „Забрзување на еволуцијата на земјоделската технологија во земјоделско-прехранбениот систем на ЕУ“ финансиран од програмата Interreg Europe, во кој Општина Кочани учествува како проектен партнер, додека Земјоделскиот факултет е вклучен како клучна засегната страна која дава директна поддршка со својата научна и стручна експертиза.
Работилницата ја отвори деканката на Земјоделскиот факултет, проф. д-р Емилија Арсов, која во своето воведно обраќање ја нагласи важноста од поврзувањето на локалната самоуправа, академската заедница, компаниите и земјоделците во функција на модернизација и унапредување на аграрниот сектор.
Главната цел на работилницата беше разгледување на дигиталните решенија и алатки во сточарското и растителното производство и споделување добри земјоделски практики базирани на принципите на одржливо земјоделство.
Настанот успешно обедини претставници од сите релевантни чинители – земјоделци, советници, претставници од приватниот сектор, локалната самоуправа и академската заедница, со заедничка заложба за понатамошна размена на знаења и зајакнување на меѓусебната соработка во регионот.
