Завршија армирано-бетонските работи на Планинарскиот дом на Пониква, чија изградба е во рамките на прокетот „Планински велосипедски рај“. Објектот ја доби новата скелетна конструкција. Стручните  служби од Општина Кочани најавуваат работа на кровната конструкција и  на покривот.

Планинарскиот дом ќе има 28 легла распоредени во двокреветни и повеќекреветни соби,  кујна, трпезарија и просторија за предавања и работилници.

– Реализацијата на проектот „Планински велосипедски рај“ ќе придонесе за проширување на туристичкиот потенцијал, со посебен акцент на планинарството и планинскиот велосипедизам. Целта е да развиеме едно уникатно планинско авантуристичко искуство. Задоволни сме што реализираме уште еден проект поврзан со туристичката инфраструктура што се вклопува во стратешките цели на Општина Кочани – вели градоначалникот на Општина Кочани Николчо Илијев.

Работите од проектот „Планински велосипедски рај“ се изведуваат со средства што ги доби Општина Кочани во рамките на подгрантовата шема на проектот „Локална и регионална конкурентност“ финансиран од ИПА 2 доверителскиот фонд на Европската Унија, администриран од Светска банка.

За проширување на туристичкиот потенцијал и за создавање услови за развој на авантуристичкиот туризам се наменети вкупно 30.674.272 денари, од кои 10 проценти се учество на Општина Кочани.

По завршувањето на патната инфраструктура кон Пониква и реконструкцијата на ски-лифтовите, во изминативе три години ова е третиот крупен проект за развој на туризмот на Осоговските Планини.