Untitled Document
kocani.gov.mk
wikipedia
Untitled Document
Вести
Течат градежните работи на објектот Пречистителна станица за отпадни води
Градоначалникот на Општина Кочани, Ратко Димитровски го посети градилиштето на Пречистителната станица за отпадни води во Мојанци и направи увид во работите на колекторот дел 1.

– Забележуваме дека состојбата е работна, механизацијата е вклучена целосно, изведувачот WTA и подизведувачот „Жикол“ квалитетно ја извршуваат својата работа, и ги решаат оние почетни проблеми што ги имаа со подземните води. Сè на сè регистрираме еден нормален тек на работите на Пречистителната станица – соопшти градоначалникот Димитровски.

Според раководителот на градежните работи, на објектот Пречистителна станица се изведуваат подготвителните работи, по што ќе следува подобрување на тлото и за кратко време ќе следуваат бетонските работи.

– Работите течат според предвидената динамика. Се соочуваме со проблем со подземните води кои се со голем интензитет, настојуваме со поголем број пумпи да ги совладаме и да течат нормално сите градежни работи – изјави раководителот на објектот, Видое Стојковски.

Пречистителната станица за отпадни води ќе придонесе за одржлив развој на Кочанскиот Регион, преку заштита на природните ресурси и ќе го промовира економскиот развој на регионот како што се индустријата, земјоделството и туризмот. Проектот опфаќа проширување на канализацискиот систем во Кочани, вклучително и изградба на главен колектор долг 12 км, изградба на пречистителна станица за отпадни води, корпоративен развој на Комуналното јавно претпријатие „Водовод“, подигнување на јавната свест и зајакнување на секторот за отпадни води односно дијалог за политиките.

Целиот проект чини околу 23 милиони швајцарски франци, од кои 92 проценти се грант од Владата на Швајцарија, 7 % од Владата на Република Македонија, 1 % од Општина Кочани и од КЈП „Водовод“.
Untitled Document
Локалитети