Заврши постапката за излегување на Општина Кочани на слободниот пазар за електрична енергија, односно за излегување од системот на ЕВН, од кој единицата на локалната самоуправа досега се снабдуваше со струја.

Од 1 октомври оваа година фирмата „Енерџи деливери солушн“, ќе ја снабдува Општина Кочани со електрична енергија. Оваа компанија е избрана по тендерската постапка и таа даде најповолни услови за снабдување со електрична енергија, соопштуваат стручните служби во Општината.

Според понудените цени, се очекува Општината да ги намали трошоците за електрична енергија за триесетина проценти. Со тоа Општина Кочани е прва и засега единствена во државава којашто се снабдува со струја на слободниот пазар.